आशिका तामाङ र सभामुखबीच बोल्ने समयलाई लिएर सवाल–जवाफ
काठमाडौं । प्रतिनिधिसभाको सोमबारको बैठकमा राष्ट्रिय स्वतन्त्र पार्टी (रास्वपा)की सांसद आशिका तामाङ र सभामुख डीपी अर्यालबीच बोल्ने समयलाई लिएर केहीबेर सवाल–जवाफको अवस्था सिर्जना भएको छ।आकस्मिक समयमा आफ्नो विषय राख्न खोजेकी सांसद तामाङलाई सभामुख अर्यालले सुरुमा समय उपलब्ध गराएनन्। उनले उठाउन खोजेको विषय आकस्मिक प्रकृतिको नभएको भन्दै सभामुखले तत्काल बोल्न समय नदिएका हुन्। सरकारको ध्यानाकर्षण भइसकेको विषय भएकाले अहिले बोल्न आवश्यक नभएको उल्लेख गर्दै सभामुख अर्यालले तामाङलाई आफ्नो स्थानमा बस्न आग्रह गरेका थिए। तर सभामुखको आग्रहपछि पनि तामाङ आफ्नो स्थानमा उभिइरहिन् र विषय राख्ने प्रयास जारी राखिन्।त्यसपछि सभामुख अर्यालले संसदीय प्रक्रिया तथा प्रतिनिधिसभाको मर्यादा कायम गर्न तामाङलाई सचेत गराए। सभामुख अर्यालले भने, “माननीय सदस्य आशिका तामाङ, यो प्रतिनिधिसभा हो। यहाँको मर्यादा कायम गर्नुस्। मैले माननीय सदस्यलाई समय दिएको छैन, माइक पनि दिएको छैन। त्यसकारण माननीय सदस्यले एकोहोरो बोल्ने होइन।” सभामुखको पटक–पटकको आग्रहपछि पनि तामाङ बस्न तयार नभएपछि बैठक केहीबेर सोही विषयमा केन्द्रित भएको थियो। अन्ततः सभामुख अर्यालले तामाङलाई आफ्नो विषय राख्न बोल्ने समय उपलब्ध गराए। प्रतिनिधिसभामा आकस्मिक समय तत्काल सार्वजनिक महत्त्वका विषय उठाउन प्रयोग गरिन्छ। सोमबारको बैठकमा भने सांसद तामाङले उठाउन खोजेको विषय आकस्मिक समयअन्तर्गत पर्छ वा पर्दैन भन्ने विषयमा सभामुखको निर्णयका कारण केहीबेर असहज अवस्था देखिएको हो। घटनाको मुख्य विषय सांसद तामाङले आकस्मिक समयमा बोल्न पाउने–नपाउने विषयमा सभामुख र सांसदबीच भएको मतभेद थियो।
